22.11.13

Tuesday, January 10, 2012

BASATA YAONYA MAPROMOTA WABABAISHAJI

Mkurugenzi Idara ya Ukuzaji Sanaa BASATA, Vivian Nsao Shalua  akizungumza na wadau wa Sanaa katika Jukwa la Sanaa linalofanyika kila wiki makao makuu ya Baraza hilo. Kulia ni Afisa Habari wa BASATA Aristide Kwizela.

Mdau wa Sanaa akichangia kwa hisia kali wakati wa mjadala uliohusu matukio na matamasha mbalimbali ya Sanaa na Burudani nchini kwenye Jukwaa la Sanaa.

Mkurugenzi wa Idara ya Mfuko na Uwezeshaji, BASATA Angelo Luhala aksisitiza jambo wakati akieleza haja ya Wasanii kudai mikataba kabla ya kushiriki tukio au onyesho lolote la Sanaa.

Na Mwandishi Wetu
Baraza la Sanaa la Taifa (BASATA) limewaonya wakuzaji sanaa nchini kuacha mara moja ubabaishaji wanapokuwa wanaendesha matukio na matamasha mbalimbali ya Sanaa.
Onyo hilo limetolewa mapema wiki hii na Mkurugenzi wa Idara ya Ukuzaji Sanaa wa Baraza hilo, Vivian Nsao Shalua wakati akiongea na wadau wa Sanaa kwenye programu ya Jukwaa la Sanaa inayofanyika kwenye ukumbi wa BASATA uliopo Ilala Sharifu Shamba.
Shalua alisema kuwa, Mapromota wamekuwa wakiwarubuni wasanii kwa kuwafanyisha kazi zisizo na mikataba huku wao wakinufaika na kuwaacha wasanii wakishindwa kujikwamua kimaisha.
“Utaratibu uliopo sasa kila mdau yeyote anapoandaa tamasha au tukio lolote linalohusisha wasanii lazima aje na mikataba na wasanii hao, aoneshe uwezo wake kifedha katika kuendesha tukio lakini pia awe na kamati inayoeleweka ya uendeshaji” alisisitiza Shalua.
Aidha, aliongeza kuwa, kumekuwa na ukiukwaji kanuni na taratibu za uendeshaji matukio hayo ambapo Baraza limekuwa likiwapa onyo na kuwafungia wahusika lakini akasisitiza kuwa, njia pekee ya kuepuka hali hii ni kwa mapromota kufuata taratibu zilizopo.
Akizungumzia kuhusu suala la mikataba, aliwataka Wasanii kuhakikisha hawashiriki tukio au onyesho bila kuwa na mkataba na waandaaji kwani hali hiyo inawafanya wadhulumiwe na kushindwa kudai haki zao kwa mujibu wa makubaliano.
“Ni lazima sasa wasanii wadai mikataba. Sisi tunawabana wakuzaji sanaa (mapromota) kuambatanisha mikataba yao kabla hatujawapa kibali lakini lazima na wasanii waoneshe wajibu wao kwa kudai mikataba na kutoshiriki maonyesho bila makubaliano ya maandishi” alionya Shalua.
Alisisitiza kuwa, Baraza litakuwa makini katika kufuatilia wadau wanaopewa vibali vya kuendesha matamasha na matukio mbalimbali ya Sanaa na mara taratibu na kanuni zitakapokiukwa halitasita kuchukua hatua za makusudi.

1 comment:

Anonymous said...

Yani hakuna watu wanaoniudhi kama Basata,hawa jamaa wamejawa na unafki na mimi nawaambia wasanii Kama mmeweza kusema Ruge na Kusaga ni mafisadi Basi mnahaki ya kusema basata pia ni mafisadi matatizo yooote ya wasanii yanaanzia Basata naomba rais uliangalie kwa kirefu hiliswala,Kama umeweza kuvunja baraza la mawaziri na kubadilisha wafanyakazi idara tofauti wale wanaonekana wana kaufisadi basi hautoweza kushindwa kwa hawa wazee wa Basata makongamano yamepita zaidi ya mia alafu Hakuna kinachoendelea zaidi ya kuumiza wasanii wetu wa Tanzania na ukitaka kujuwa kuwa wasanii hawanakitu zaidi ya kujiosha,siku aumwe na matibabu india utaskia huruma....bay Ntwara